A Xunta activa o novo sistema de autorizacións integrado coas navieiras autorizadas para acceder ás Illas Cíes para este verán

A Consellería de Medio Ambiente e Ordenación do Territorio, en colaboración coa Amtega, deseñou un novo sistema de xestión de autorizacións que se activa hoxe, válido para as reservas que se realicen a partires do 1 de xullo
Por o 01/06/2018 | Sección: Galicia,Vigo
A Xunta activa o novo sistema de autorizacións integrado coas navieiras autorizadas para acceder ás Illas Cíes para este verán

Todas aquelas persoas que desexen visitar este verán as Illas Cíes a partir do 1 de xullo poderán adquirir a súa autorización de acceso no novo sistema integrado de emisións de autorizacións, activado dende hoxe pola Consellería de Medio Ambiente e Ordenación do Territorio, en colaboración coa Axencia de Modernización Tecnolóxica de Galicia (Amtega).

Así o avanzou esta mañá a directora xeral de Patrimonio Natural, Ana María Díaz, durante a entrega dos diplomas aos membros da Garda Civil participantes nun curso sobre dominio público marítimo terrestre nos Parques Nacionais, organizado polo Organismo Autónomo de Parques Nacionais (OAPN) e Ministerio do Interior; onde recordou que o sistema habilitado hoxe é moi similar ao implantado xa en Semana Santa, baseado nunha autorización personalizada; pero en adiante o novo sistema está tecnoloxicamente integrado cos sistemas informáticos das navieiras permitindo en tres sinxelos pasos, adquirir o billete e emitir a autorización.

Así, as persoas que pretenda realizar unha visita ás Cíes a partir do 1 de xullo deberán completar a través da web https://autorizacionillasatlanticas.xunta.gal a información solicitada en catro pasos, para obter unha prereserva gratuíta, coa que posteriormente adquirir o billete de transporte nunha das navieiras autorizadas.

A directora xeral explicou que esta autorización gratuíta terá unha validez de dúas horas condicionada á adquisición do billete ás navieiras. Unha vez adquirido o billete, o sistema web emitirá a autorización definitiva; pola contra, no caso de que o billete non fose adquirido no devandito prazo, a prereserva perderá a súa validez. Ana María Díaz indicou as operacións que se realizarán para a adquisición da autorización e un proceso telemático, polo que é rápido, eficaz e seguro para os usuarios.

Asemade, aclarou que a implantación deste sistema tamén garante un maior control de acceso ás Illas, xa que impediría a sobrevenda de billetes por parte das navieiras ao terse que ligar o billete de xeito automático a unha autorización, individual, nominal e intransferible para cada visitante.

Non obstante, indicou que a Consellería de Medio Ambiente manterá cos controis das autorizacións dos visitantes para evitar problemas como os acontecidos o pasado verán; polo que se manterán os controis mediante a lectura do código de autorización, tanto nos portos de saída como no desembarco nas illas, para que permitan ás 2.000 persoas que acceden por liña regular, aos 800 campistas e ás 200 persoas de viaxes educativos gozar deste entorno.

Por último indicou, que ata o 30 de xuño convivirán os dous sistemas de autorización, pois no presente mes só se pode visitar as Illas Cíes durante a fin de semana. Deste xeito, os visitantes deberán completar a información solicitada en catro pasos para obter unha autorización, coa que poderá adquirir o seu billete. Este sistema quedará inhabilitado a partir do 1 de xullo, momento no que só se poderá adquirir a correspondente autorización co sistema activado hoxe.

Formación sobre o dominio público marítimo terrestre

A directora xeral de Patrimonio Natural fixo entrega aos membros da Garda Civil que participaron nun curso formativo sobre o dominio público marítimo terrestre nos Parques Nacionais, procedentes de distintas demarcacións costeiras de España.

A directora xeral salientou a necesidade de reciclar e formar aos membros da Garda Civil en materia de vixilancia, inspección, control e denuncia de actividades ilícitas sobre a natureza na Rede de Parques Nacionais, a Rede Española de Reservas da Biosfera ou nos puntos que integran o patrimonio natural do Estado. Agradeceu o traballo de vixilancia de todos estes espazos naturais que realizan máis dun centenar de dotacións da Garda Civil, entre patrullas do Seprona e varias dotacións do Servizo Marítimo, prestando un eficaz traballo para a protección do patrimonio natural.

Durante o curso, os participantes tiveron conferenciase, talleres prácticos e levaron a cabo tarefas de identificación de especies exóticas, colocación de trampeos, ou a identificación de lixo mariño. Tamén se fixo fincapé na lexislación e xurisprudencia na costa e mar, as respostas ante a contaminación mariña accidental, os deslindes, a biodiversidade non intermareal, normativas e protocolos de mostreos, ou salvagarda do patrimonio cultural subacuático.