O grupo Remoss constata a viabilidade da reanimación cardiopulmonar nun barco a velocidade elevada

A partires dun estudo realizado con bateeiros de Rianxo
Por o 31/10/2018 | Sección: Galicia,Pontevedra,Universidade de Vigo
O grupo Remoss constata a viabilidade da reanimación cardiopulmonar nun barco a velocidade elevada
Compartir en:

En caso de sufrir no mar un accidente ou episodio de paro cardíaco, iniciar na propia embarcación as manobras de reanimación cardiopulmonar (RCP) pode ser un factor decisivo para salvar a vida da persoa accidentada e, se as condicións do mar o permiten, estas poden levarse a cabo cunha calidade suficiente a bordo da embarcación mentres se avanza cara porto a unha velocidade elevada. Así o constatou o grupo de investigación Remoss (Rendemento e Motricidade do Salvamento e Socorrismo), da Facultade de Ciencias da Educación e do Deporte, nun estudo realizado con bateeiros da Confraría de Pescadores de Rianxo que veñen de publicar na revista BioMed Research International. “O artigo analiza o efecto da velocidade sobre a calidade da RCP e ten como novidade que por primeira vez avaliouse a calidade nos barcos de pesca a unha velocidade tan alta como 20 nós”, sinala o investigador principal do grupo, Roberto Barcala, dun estudo no que os pescadores participantes realizaban manobras dunha calidade similar ás velocidades de 10 e 20 nós, aínda que en ambos casos cunha calidade inferior á rexistrada en terra,.

Dando continuidade a un estudo previo centrado na incidencia do vento nas manobras realizadas a bordo dunha embarcación pesqueira de pequenas dimensións, publicado no American Journal of Emergency Medicine, e que formaba parte, ao igual que este traballo, da investigación que o alumno de doutoramento Ramón Fungueiriño desenvolve para a súa tese de doutoramento, o estudo levouse a cabo na ría de Arousa coa colaboración de 20 bateeiros da Confraría de Rianxo. Todos eles realizaron unha simulación de RCP cun manequín no propio porto e dúas, a dúas velocidades diferentes, a bordo dunha embarcación. Simulacións que permitiron aos investigadores e investigadoras avaliar aspectos como a profundidade e a frecuencia das compresións torácicas ou o aire insuflado nas ventilacións. Variables coas que pudieron medir a eficacia das manobras, que sitúan nun 77% na proba realizada en terra, nun 59% na realizada a unha velocidade de 10 nós e nun 57% na realizada a 20 nós, como recolle o artigo Coastal Fishermen as Lifesavers While Sailing at High Spped: A Crossover Study, que Barcala e Fungueiriño asinan xunto ao investigador do grupo Remoss e docente da Escola Universitaria de Enfermaría de Pontevedra Felipe Fernández, os investigadores da Universidade de Santiago de Compostela Antonio Rodríguez Núñez, Violeta González e Rubén Navarro; Marta González, do Complexo Hospitalario de Pontevedra, e o docente da Universidade da Coruña Santiago Martínez.

Canto antes, mellor

“Por cada segundo que se retrasa a reanimación, pérdense entre un 10% e un 12% de posibilidades de supervivencia”, sinala Barcala que incide na importancia de iniciar a bordo as probas manobras, máxime tendo en conta que “a pesca é unha das ocupacións máis perigosas e que máis afogamentos provoca”. De aí que incida na importancia de avaliar a calidade da RCP a bordo dunha embarcación, obxecto dunha investigación que dá continuidade a un estudo realizado previamente polo grupo Remoss con socorristas, mais desta volta poñendo o foco nos propios profesionais do sector pesqueiro, “que teñen por lei que realizar un curso sobre reanimación, pero é un curso que se lles imparte en terra, cando se lles pasa algo, vai ser no mar”, lembra Barcala, que salienta como conclusións desta investigación tanto a importancia que ten levar a cabo unha “intervención inmediata” como a necesidade de “realizar este tipo de formación nos propios barcos”.

De feito, os participantes no estudo realizaban no porto unhas manobras dunha calidade, segundo recolle o artigo, similares as de colectivos como policías ou profesores, mentres que, a bordo, “os resultados evidentemente empeoraban canto maior fose velocidade, pero a calidade non chega a ser tan mala como para indicar non facela”, sinala. De aí que a conclusión da investigación que proxectan continuar avaliando a calidade da RCP co mar en malas condicións, sexa “que se as condicións do mar son seguras, en caso de afogamento ou paro cardíaco, pódese navegar cara porto realizando a manobra a 20 nós e isto o unimos ao estudo que fixeramos previamente, se que poidamos, facelo a favor de vento”.

As condicións do mar, terceiro factor de análise

Tralo estudo que analizaba a incidencia do vento e o recollido neste artigo, a investigación complétase nestes días coa realización dunha terceira medición da calidade da RCP con profesionais do sector, nesta ocasión, poñendo o foco nos efectos que poden ter as condicións climatolóxicas adversas, e que motivaron que este mércores se levase a cabo unha terceira sesión de medicións, empregando o mesmo tipo de embarcación e levándoa á cabo mesma contorna da Ría de Arousa, para así poder avaliar, explican, a incidencia que as condicións do mar poden ter nestas manobras de reanimación.

Comentar noticia

Your email address will not be published.